Ballan-qaadka Xukuumadda, Baaqa Culimada, Biimaha Dhalinyarada ee Halsita Tahriibka iyo Murugada Waalidka Ubadkoodu le’deen

“Anigu waan doonayey markii hore inaan tahriibo, laakiin wakhtigan diyaar uma ihi inaan u badheedho halista dhimashada sidii saaxiibkay oo...”
Lampedusa, 22 Nov, 2014 (Himilo)- Warbixin Telefishanka Euronews ka diyaariyey halista in badan oo dhalinyarada reer Somaliland kala kulmaan Tahriibka ay ku beegsadaan gaadhitaanka waddmada Qaaradda Yurub, ayaa lagu caddeeyey in wakhtigan is-beddel ku yimi fikirkii qaar ka mid ah dhalinyarada u xadhko xidhnayd u badheedhka halaagga tahriibta, ka dib markii ay garawsadeen geerida ku suntan halista tahriibta Badda iyo Saxaraha-ba.
Warbixinta Euronews ayaa lagu bilaabay in sannad walba kumanaan dhalinyaro ah nafahooda ugu biimeeyaan badda Mediterrannean si ay nolol wanaagsan helitaankeeda u tagaan qaaradda Yurub, ayaa dalka Somaliland oo baddi ka badbaaday qulqulatooyinka iyo qalalaasaha ka taagan Soomaaliya dhalinyaradoodu ku hamiyayaan sidii ay nolol wanaagsan ugu doonan lahaayeen meelo kale, maadama sababta ugu weyn ee hayaankoodu yahay shaqo la’aan ka jirta dalkooda.
Warbixinta Teleifishanka ayaa lagu sheegay sida Waalidiin badan oo ubadkoodu ku geeryoday tahriib ay u dhaqaaqeen xilligan u haysato murugadu. “Nin lagu magacaabo Waraabe oo ka shaqeeya sayladda xoolaha Hargeysa ayaa sheegay in inankiisu dijiile doonayey helitaanka nolol fiican iyo inuu lacag soo shaqeysto, maadama inbadan oo saaxiibadii tageen Yurub. Waxaan u iibinay baloodho aanu lahayn, si maqadeyaashu u sii daayaan qafaashay. Balse billo ka dib aan filayo inuu gaadhay halkuu ku hamiyayey ayaa telefoon Liibiya ah layga soo sheegay inuu dhintay wiilkaygii.” Sidaa ayaa lagu yidhi Warbixinta.
Ugu yaraan inka badan saddex kun oo qof oo tahriibayaal ah, ayaa ku dhintay ka tallaabidda Badda u dhexeysa Liibiya iyo Talyaaniga sida xogaha la hayaa sheegayaan, inkastoo tirada intaa laga badinayo, maaddaama oo Meydad badani Badaha ku lumen.
Hooyo magaceeda lagu soo gaabiyey Sureer oo khudrad ku iibisa Suuqa Caasimadda Hargeysa, ayaa sheegtay inaanay wax macluumaad ah ka hayn inan ay dhashay oo sannad horteed u hayaantay Liibiya si ay nolol wanaagsan ugu raadsato Yurub, waxaanay tidhi; “Werwer weyn ayaa maalin walba iga haysta nolosha inantaydii oo muddo sannad aanan wax warar ah ka helin, mar waxay tidhi Maqade ayaa I haysta, lacag ayaan u dirnay, ka dib waxa lanoo sheegay inay gaadhay Talyaaniga, balse wax warar ah weli kama hayno halkay ku dambaysay.”
Dhalinyaro ay saaxiibbo ahaayeen Wiil lagu magacaabo Dijiile oo ku dhintay Liibiya, ayaa sheegay in dhimashada saaxiibkood oo kaftan wadaag badan lahaayeen is-beddel ku keentay fikirkoodii inay raacaan waddaddii saaxiibkood ugu hayaamay halista Tahriib lagu gaadho Yurub.“Qof walba waxuu ku hamiyaan tegitaanka Yurub, annigu waan doonayey markii hore inaan tahriibo, laakiin wakhtigan diyaar uma ihi inaan u badheedho halista dhimashada sidii saxaiibkay.” ayey yidhaahdeen Dhalinyarada reer Hargeysa ee Saaxiibbadood ku naf-waayeen halaagga Tahriibta iyo beegsiga Yurub.
Warbixinta Euronews, ayaa lagu sheegay in Xukuumadda Somaliland ay ka go’an tahay yareynta shaqo la’aanta iyo sdii shaqo-abuur cusub loogu diyaarin lahaa dhalinyarada waxbarashadii Jaamacadaha dhammaysatay, oo dhaqaale badan iyo taageero ka filayaan Midowga Yurub si dhalinyaradoodu ugu negaadaan dalkooda Hooyo.
Inastoo ay muuqato halista Tahriibku ku hayo wakhtigan badi dhalinyaradii, ayaa dhinaca kale waxay u muuqdaan kuwo aan dhego u lahayn Baaqyada Culimada waaweyn ee dalku ugu soo jeedinayaan sida Diinta Islaamku u xaaraantimaysay inuu qofku naftiisa halligo, isla markaana aanay Diinta Islaamku bannaynayn in loo hayaamo dhulka Gaalada xaalado gaar ah dartood mooyaane, balse aanay marnaba oggolayn inuu qofku yidhaahdo nolol ayaan u doonayaan dhul Gaalaad aan amni ahayn.
Himilomedia.com
Hargeysa-Somaliland