Quwadaha Carabta Oo Dedaal Ugu Jira Sidii Falastiin U Heli Lahayd Aqoonsi Caalami ah

Ca’ira:Nov,30,2014(Himilo)-Waddamda ku carbeed eek u Bahoobay Jaamacadda carabta, ayaa isku raacay inay Golaha ammaanka geeyaan qaraar lagu aqoonsanayo Mujtamaca reer Falastiin oo xilligan dulmi ku jira.

Qorshahan oo ay soo diyaarisay dowlada Jordan (Urdun) oo xiligan kamid ah xubnaha aan-joogtada-ahayn ee golaha amaanka, ayaa waxaa taageeray dhamaan dalalka Carabta.

Wasiirada Arrimaha Dibada ee dalalka Carabta oo sabtidii shalay shir ku yeeshay magaalada Qaahira ayaa cod ku taageeray in qorshahan loo gudbiyo Golaha Amaanka.

Mooshinkan ayaa qoraya in la iclaamiyo xiliga la aqoonsanayo Qaranka Falastiin oo magaalo madax u noqon doonta Bariga magaalada Qudus, iyadoo la tixraacayo xaduudihii 1967dii.

November 2012 ayey ahayd markiii golaha loo dhan yahay ee Qaramada Midoobay uu aqoonsaday Qaranka Falastiin, balse go’aanka kama danbeysta ah ayaa ka go’a Golaha Amaanka ee Qaramada Midoobay.

Dowlada Maraykanka oo codka qayaxan (VETO power) ku leh Golaha Amaanka ayaa hore u joojisay go’aano lagu taageerayey Falastiin oo lidi ku ahaa Isra’iil oo ay xulafo yihiin.

Jaamacada Carabta ayaa gudi ka kooban dalalka Jordan, Muritaaniya iyo Sucuudiga u saaray inay olole ka dhexbilaabaan Qaramada Midoobay kahor intaan mooshinkan la geyn Golaha Amaanka.

 

 

Himilo Media