Madaxweyne Gaas Oo Ku Baaqay Shirweyne Qaran Oo Beelo Deggen Gudaha Somaliland Uu U Qabanayo

Garowe:Nov,28,2014(Himilo)-Madaxweynaha Maamul-goboleedka Soomaaliyeed ee Puntland Cabdiweli Maxamed Cali Gaas oo booqasho ku jooga Magaalo xeebeedda Boosaaso, ayaa ku baaqay shirweyne qaran oo uu sheegay inuu u qabanayo beelaha maamulkiisa ku abtirsada, balse wali saluugga muujinaya.

Mudane Gaas waxa uu sheegay in shirweynahaas oo ujeeddadiisu tahay sidii beelaha maamulkiisa hoosyimadda loo heshiisiin lahaa, waxana uu shirkaasi qabsoomayaa 20-bisha January ee sanadka cusub, isagoo socon doona Muddo 10-cisho ah.

Wararka u dhoon daloola madaxtooyada maamulkaas, ayaa sheegaya in ujeeddada shirku yahay in Beelo deggen deegaanno ka tirsan Bariga Gobollada sanaag iyo Sool oo Gudaha somaliland ah la doonayo sidii shirkaas loogu casuumi lahaa, maadaama maamulkaasi sheegto inuu dhulkaas leeyahay.

Goobo kamid ah dhulkan ayaanay joogin somaliland, waxana haatan ku sugan Kooxda Khaatumo ee uu hoggaamiyo Cali Khaliif, waxana uu Madaxweyne Gaas doonayaa inuu Waxgaradka Deegaankaas Shir ugu qabto Gudaha Puntland.

Deegaanka uu Madaxweyne Gaas doonayo inuu dadka deggen shir ugu baaqo ayaa gebi ahaanba ah Somaliland, waxase jira Siyaasiyiin kasoo jeedda oo ku jira Maamulkaas, kuwaas oo Warbaahinta ka sheego in dhulkaasi yahay Puntland.

Baaqa shirkan ayaa waxaa uu ku soo beegmayaa iyadoo dhowaan uu Hoggaamiyaha Khaatumo Cali Khaliif Galaydh uu ku eedeeyay dowlada federalka inay maamulkiisa diidan tahay.

 

Himilo Media