Dawladda Itoobiya oo jawaab ka bixisey hadal Cali Khaliif ku sheegay is-faham ay ka yeesheen khilaaf u dhexeeyey

Hargeysa, 19 Nov, 2014 (Himilo)- Dawladda Itoobiya, ayaa waxba kama jiraan aan sal iyo raadtoona lahayn ku tilmaantay hadal dhowaan ka soo yeedhay hoggaamiyaha kooxda la baxday Khaatumo Prof Cali Khaliif oo sheegay in Is-faham dhexmaray isaga iyo dadweynaha dhexe ee Itoobiya, ka dib markii bishii hore dawladda Itoobiya ku amartay inuu ka baxo magaalada Addis Ababa oo socdaal ku joogay.
Cali khaliif Galaydh oo muddo immika laga joogo dhowr usbuuc xukuumadda Itoobiya ku amartay inuu degdeg uga baxo dalkooda, xilli uu sheegay inuu magaalada Addis Ababa shir kaga qayb-galayey, ayaa wareysi dhowaan uu siiyey warbaahinta Af-Soomaaliga ku hadashay qaarkood ku sheegay inuu dhamaaday khilaafkii soo kala dhexgalay xukuumada Itoobiya, isla markaana uu martiqaad rasmi ah ka haysto.
Haseyeeshee, waxa hadalka Cali Khaliif waxba kama jiraan ku tilmaamay safiirka dawladda Itoobiya u fadhiya Somaliland Brig. Gen Berhe Tesfaye oo Wargeyska Himilo wax ka weydiiyey jiritaanka is-fahamka Cali Khaliif sheegay inay wada-gaadheen dawladda Federaalka Itoobiya.
Mr Tesfaye oo ka jawaabayey su’aal Wargeyska Himilo ka weydiiyey arrintan, ayaa sheegay inaanay jirin mansab dawladdiisu aqoonsan tahay oo Cali Khaliif kalsooni kaga haysto dawladda Itoobiya, waxaanu yidhi, “Uma arko nin aanu qorshe ka leenahay inuu yahay, mana jirto masuuliyad aan u aqoonsan nahay inuu hayo. Xaqiiqdiina, ma jirto isfaham iyo martiqaad dhexmari kara Itoobiya.”
Prof Cali Khaliif oo warbaahinta dhowaan la hadlay, waxa uu hadalkiisaas ku sheegay oo ku yidhi, “Khilaafkii noo dhexeeyey xukuumadda Itoobiya wuu dhamaaday oo raaligelin ayey iga siiyeen saraakiil laygu soo diray Nayroobi. Wakhtigan martiqaad rasmi ah ayaan ka haystaa aan ku tegi doono markaan ka soo laabto Maraykanka.”
Prof Cali Khaliif oo dhaq-dhaqaaqyo nabad-gelyo-darro ah ka wada deegaamada Bariga Somaliland meelo ka mid ah isla markaana dhinaca xuduudka Itoobiya u baxsaday ka dib markii uu ka baxday hawl-gal ciidamada Qaranku ka fuliyeen magaalada Saax-dheer ee gobolka Sool oo ku taala Xuduudka Itoobiya iyo Somaliland dhowr bilood ka hor, halkaas oo uu ka soo abaabulo dhaq-dhaqaaq malleeshiyada kooxdiisu ka fuliyaan gudaha xuduudka Somaliland, taas oo sababtay in xukuumadda Somaliland dacwad uga gudbiso Dawladda Federaalka ee Itoobiya oo qaadatay go’aanka ay dalkeeda kaga mastaafurisay.
Himilomedia.com
Hargeysa-Somaliland