Obama Oo Ku Dhawaaqay Qorshe Ka Farxadgeliyey 5-Milyan Oo Qof Oo Shacabkiisa Kamid ah

Washington:Nov,21,2014(Himilo)-Dalka Maraykanka, ayaa lagu tiriyaa waddanka ay ku sugan yihiin dadka ugu badan ee sharcidarrada ku joogaa, waxana arrintaas darteed xalay war cusub ugu dhawaaqay madaxweynaha Dalkaas Mudane Barack Obama.

Waxa uu madaxweynuhu khudbad si weyn loo sugayey oo uu Habeenkii xalay ahaa jeediyey ku sheegay in wax-ka-beddel lagu sameeyey sharciyadda dalkaas iyo hannaanka dadka soo gelootiga ah loola dhaqmo.

Ku dhowaad 5-milyan oo qof oo dadka soo galootiga ayaa heli doona sharci kumeelgaadh ah oo u sahlaaya in ay deganaadaan isla markaana shaqeystaan.

Balse arrintan waxaa si weyn uga soo horjeeda Xisbiga Mucaaridka ah ee Jamhuuriga oo doorashadii Baarlamaanka ee dhacday 4-tii November la wareegay inta badan kuraasta labada gole ee Baarlamaanka Maraykanka.

Dalka Mareykanka waxaa ku nool 11-millyan oo qof oo soo galooti ah, waxaana sanadkan kordhay caruurta kasoo galaya xuduudaha.

Hannaankan cusub ee sharci ayaa waxa si weyn uga faa’iidaysan doonaa Malaayiin qof oo la ildarnaa sharcidarro haysatay oo ku keentay inay shaqaysan kari waayaan muddo badan oo ay dalkaas joogeen.

 

Himilo Media