Badhasaabka Awdal oo ka deyriyey tiro- yaraanta Gaadiidka Caafimaadka ee Gobolka

Boorama, 02 June, 2015 (Himilo)- Badhasaabka Gobolka Awdal Maxamuud Cali Saleebaan Ramaax, ayaa walaac ka muujiyey tiro-yaraan ka jirta gaadiidka fududeeya adeegyada caafimaad ee gobolka ee Ambalaaska, waxaanu sheegay in gobolka oo deegaamadiisu buuro iyo Xeebo u badan yihiin aanay haba-yaraatee lahayn tiro ku filan oo gaadiidka caafimaadka ah.
Badhasaabka gobolka Awdal waxa uu sidan ka sheegay kulan lagaga hadlay xoojinta Ammaanka Gobolka, ilaalinta Hantida iyo horumarinta gobolka, kaas oo ay isugu yimaaddeen madaxda Laamaha Dowladda.
Maxamuud Cali Saleebaan oo markii kulankaasi dhammaaday warbaahinta la hadlay, ayaa sharraxay arrimaha lagaga hadlay kulanka, waxaanu yidhi, “Waxaanu iskugu nimid masuuliyiinta gobolka iyo isuduwayaasha wasaaraddaha dawladda, waxaanu kagaga wada hadalnay arrimo dhawr ah oo ay lambar kow tahay xoojinta nabad galyada, ilaalinta hantida umadda, daba galka iyo ka-wada-shaqaynta mashaariicda ka socota gobolka.”
Waxa uu Badhasaabka Awdal sheegay in gobolka Awdal oo dhul buuralay ah ku yaalaa ka liito dhinaca gaadiidka caafimaadka, waxaanu yidhi, “Waxaan gobolka u soo helay 2 Ambalaas oo aanu khamiista ku wareejin doono Wasaaradda Caafimaadka. Runtii gaadiidka Ambalaasku wuu nagu yaraa intana naguma filna ee meelo badan ayaanu uga baahannahay hadday tahay degmooyinka iyo hadday tahay Caasimada gobolkaba, waxaanu runtii u baahannahay dhawr ambalaas maadaama gobolku buuralay iyo xeeb u badan yahay oo degma walba loo baahan yahay inuu hal ambalaas joogo.”
Himilomedia.com
Hargeisa-somaliland