Israa’iil oo horjoogsatay Shuruuc lagu cunsuriyadaynayo Shacabka Falastiin

Quddus, 21 May, 2015 (Himilo)- Dowladda Israa'iil, ayaa gebi ahaan joojisay shuruuc cusub oo waajibinaya inaanay dadka Falastiiniyiinta iyo Yuhuuda isla raacin Gaadiidka dadweynaha ee isaga dhex-goosha dhulka Daanta Galbeed oo qaybo ka mid ah ay dowladda Israa’iil xoog ku haysato.
Kooxo metalaya Yuhuudda deggen dhulka la haysto ee Falastiin oo u ololeynayey qorshahan ah inaanay laba shacab isla raacin basaska sababo ammaan awgeed. Haseyeeshee, waxa ka soo horjeestay ololahan isla markaan dowladda Israa’iil ku badhi-taageeray laalistiisa kooxaha u dooda xuquuqda aadanaha oo ku tilmaamay cunsurinimo.
Ku dhawaad 500,000 oo Yuhuud ah ayaa ku nool in kabadan boqol deegaan oo laga dhisay tan iyo markii ay Israa'iil qabsatay Daanta Galbeed iyo Bariga Qudus dagaalkii ay kaga guulaysatay waddamada Carabta. Shuruucda caalamiga ah, ayaa dhigaya inaanay sharci ahayn deegaamadaasi.
Qorshahan oo dowladda Israa’iil loo gudbiyey, ayaa lagu sheegay inaanay si toos ah uga mamnuucayn Falastiiniyiinta in ay raacaan basaska Yuhuudda u qaada degmooyinka dhulka Falastininta looga dhisay ee Daanta galbeed, waxase lagu sheegay in Falastinintu ay galinka dambe oo kali ah raaci karaan basaska Daanta Galbeed, arrintaas oo loo arkay mid kala-qoqob iyo cunsuriyad ku dhex abuurta wada-noolaanshaha Falastiiniyiinta iyo Israa’iiliyiinta oo marka horeba aan nabad ku wada-joogin.
Dowladda Israa’iil oo ka cabsi qabta in arrintani kacdoonno hore leh ka dhex-abuurto, ayaa is-hortaagtay isla markaana joojisay qorshaha ay u soo gudbiyeen kooxo Mayal adag oo u dhaq-dhaqaaqa Yuhuudda ku dhaqan Dhulka Daanta Galbeed ee xoogga lagu haysto.
Himilomedia.com
Hargeysa-somaliland