Siyaasi Caan Ka Ahaa Dalka Djibouti Oo Saaka Geeriyooday

Djibouti:Nov,01,2014(Himilo)-Allah Ha Naxariistee waxa saaka Magaalada Djibouti ee Dalka Djibouti ku Geeriyooday Marxuum Adan Roble Awaleh oo ka mid ahaa siyaasiyiinta waawayn ee dalka Jabuuti.

Marxuun Aadan Rooble waxa uu dhashay sanadkii 1941kii Magaalada Ali-sabieh , 1969kii waxa uu tagay Muqdisho waxa uu hogaamiyay jabhadii ugu horaysay ee hubaysan ee dagaal lagasha ciidankii Faransiiska ee Gumaystaha ahaa jabhadaasi oo la odhan jiray Front for the Liberation of the Somali Coast (FLCS).

Markii gobanimada ay qaadatey Jabuuti ayuu kasoo qaybqaatay dhismihii jamhuuriyada Jabuuti , wuxuuna dalka Jabuuti ka soo qabtay xilal heer wasiirnimo iyo xildhibaan baarlamaan.

Markii la furay nidaamka xisbiyada badan dalka Jabuuti 1992kii waxa uu samaystay xisbi mucaarid ah oo la odhan jiray PND.Waxa uu marxuumku isku soo taagay doorashada jagada Madaxwaynenimo dhawr jeer ,ugu damabyntiina waxa uu ka mid ahaa isbahaysiga USN ee mucaaridka ah isagoo doorashadii ugu dambaysayna kusoo baxay Barlamanka dalka, inkastoo uu diiday in uu fadhiisto kursiga barlamanka.

Adan Roble Awaleh allaha u naxariisto waxa lagu xasuusan doonaa jihaadkii uu lasoo galay gaaladii gumaystaha ahaa ee Faransiiska ,Waxuuna ahaa siyaasi dulmi diid ah oo hadal cad.

 

 

 Himilo Media