Hawl-galka AMISOM ee Somaliya oo Madax looga Dhigay Haweenay u dhalatay Ugandha

Addis Ababa, 21 June, 2014 (Himilo)- Ku-xigeenka Ergayga gaarka ee Midowga Afrika u qaabilsan Soomaaliya Lydia Wanyoto Mutende, ayaa la sheegay inay madax u sii ahaan doonto hawl-galka Soomaaliya ee AMISOM, ka dib markii todobaadkii hore is-casilay masuulkii madaxda ka ahaa.

Mrs Wanyoto oo hore u ahayd xildhibaan ka tirsan dawladda Ugandha, ayaa xilkan qaban doonta bisha soo socota labadeeda oo uu xilka wareejinayo masuulka iska-casilay xilkaas Mahamat Saleh Annadif.

Mahamat Saleh Annadif oo arbacadii kulamo la yeeshay Madaxweynaha Soomaaliya, Raysal wasaaraha iyo Gudoomiyaha baarlamaanka, ayaa u sheegay inay haweenaydani sii haynayso xilka uu iska casilay.

Ergeyga Midowga Afrika ayaa u mahadceliyey wadamadda ku taageeray ciidamada hawlgalka AMISOM iyo sidoo kale beesha caalamka, gaar ahaan Qaramada Midoobay iyo Midowga Yurub taageerada ay ka siiyeen gudashada xilkiisii iyo kaalinta ay ka qaataan nabad-ku-soo dabaalida Soomaaliya.

 

Himilomedia.com

Hargeysa-Somaliland