Taliyaha ciidanka Booliiska Kenya David Kimaiyo ayaa sheegay inay gacanta ku dhigeen nin lagu magacaabo Ishmael Omondi oo bogga twitter-ka ka samaystay ciwaan loo haystay inay leedahay kooxda Al-Shabaab laguna baahiyey inay ka dambeeyeen weerarradaas.
"Waxaan gacanta ku dhignay dad kala duwan oo lagu xidhiidhinayo weerarkii Mpeketoni, kuna jiro mulkiilaha iyo direwalkii gaadhi loo adeegsaday weeraradii, iyo ninkii sameeyey bar Twitter oo lagu sheegay in Shabaab ka dambaysay weerarkaa," ayuu sheegay Kimaiyo oo shalay la hadlayey warbaahinta dalkaas.
"Dad badan oo la tuhmay, kuna jiraan hogaamiyeyaal ayaa wareysi lala yeeshay,” ayuu yidhi.
Inkasta oo weerarkaas masuuliyaddiisa ay maleeshiyaadka Shabaab sheegteen inay ka dambeeyeen, haddana madaxweynaha Kenya Kenyatta oo dorraad ka hadlay qaraxyadaas, ayaa ku eddeeyey qaraxyadaas siyaasiyiinta waaweyn ee dalkiisa xubno ka mid ah oo aanu farta ku fiiqin.
Dhinaca kale, maleeshiyaadka Shabaab ayaa shalay ku celiyey inay ka dambeeyeen weerarradii dhacay.
"Weerarkii Mpeketoni waxaa amray hoggaanka Shabaab, si loogu soo aargudo dilalka ay Ciidamada Kenya u geystaan muslimiinta Kenya iyo Soomaaliya," sidaa waxa yidhi afhayeenka Shabaab Abdulaziz Abu Musab oo u warramay idaacad afkooda ku hadasha.
Himilomedia.com
Hargeysa-Somaliland
No comments:
Post a Comment