Xukuumadda oo ka hadashay Ciidamo la sheegay inay u dhoofinayso Dalka Sucuudiga

Hargeysa, 22 July, 2015 (Himilo)- Xukuumadda Somaliland, ayaa waxba kama jiraan ku sheegtay warar sheegaya inay dowladda Sucuudiga heshiis kula gashay Askar ay uga diiwaangeliso gudaha Somaliland, kuwaas oo ka mid noqda isbahaysiga dalalka Carbeed ee dagaallada kula jira Jabhadda Xuutiyiinta oo la wareegay talada dalka Yemen, kaddib markii ay xukunka ka tuureen madaxweynihii iyo dowladdii dalkaas.
Wasiir ku-xigeenka wasaaradda Arrimaha Dibadda Axmed Aadan Ismaaciil (Keyse) oo shalay shir-jaraa’id ku qabtay Xarunta wasaaradda Arrimaha Dibadda, ayaa waxba kama jiraan ku tilmaamay jiritaanka arrintaas oo ku eedeeyey inay faafiyeen siyaasiyiin ka tirsan Xisbiyada Mucaaradka ah.
“Haddaanu nahay xukuumadda, waxaanu halkan ka caddeynaynaa inaanay jirin wax ciidan la qorayo oo la geynayo Sucuudiga ama dagaal kale loo wadaa aanay jirin. Masuuliyiinta Mucaaradka qaarkood, ayaa waxay soo cel-celiyaan in la qorayo Ciidamo la geynayo Sucuudiga, markaa waxaanu umadda reer Somaliland u caddeynaynaa inaanay waxba ka jirin, warkaasina yahay mid aan sal iyo raad toona lahayn. Waxaan jecelahay inaan ku booriyo masuuliyiinta mucaaradka waxaan jirin ee ay ka faafinayaan dalka,” Sidaas ayuu yidhi Wasiir ku-xigeenka Wasaaradda arrimaha Dibadda Axmed-Keyse.
Siyaasiyiin ka tirsan Mucaaradka, ayaa xukuumadda madaxweyne Siilaanyo ku eedeeyey inay ku hawlan tahay sidii ay dalka uga bilaabi lahayn Askar loo qorayo dowladda Sucuudiga oo ka qayb-qaata dagaalka lagala soo horjeedo Jabhadda Xuutiyiinta.
Himilomedia.com
Hargeysa-Somaliland