Maxaad ka taqaanaa Masuuliyiinta Madaxweynuhu u magacaabay Danjireyaasha Dalalka Imaaraadka Carabta iyo Shiinaha?

Hargeysa, 01 July, 2015 (Himilo)- Madaxweynaha Somaliland Md Axmed Maxamed Siilaanyo, ayaa digreeto uu shalay soo saaray Wakiillada dalalka Imaaraadka Carabta iyo Shiinaha u fadhiya Somaliland ugu magacaabay Baashe Cawil Cumar iyo Cabdi Maxamuud Saleebaan (Mingiiste) oo labadooduba ku cusub yihiin mansabyada muuqda ee xukuumadda Xisbiga Kulmiye.

[gallery columns="2" ids="21100,21093"]

Sida lagu faafiyey war-saxaafadeed ka soo baxay Xafiiska Afhayeenka madaxtooyada, waxa uu madaxweynuhu digreeto ku magacaabay Safiirradda Somaliland u fadhiya dalalka Shiinaha iyo Imaaraadka Carabta oo labadooduba ku soo biiray liiska waddamada ay Somaliland xidhiidhka dibloomasiyadeed la leedahay.
“Madaxweynaha Jamhuuriyada Somaliland Mudane Axmed Maxamed Silaanyo waxa uu digreeto madaxweyne oo summadeedu tahay JSL/M/XERM/249-3383/062015, ku magacaabay laba danjire oo cusub, Somaliland u fadhiyi doona Dalalka China iyo Isu-tagga Imaaraadka Carabta. Madaxweynuhu:-
Markuu Arkay: Qodobka 90aad, Faqradiisa 3aad, Xarafka (r) ee Dastuurka Jamhuuriyadda Somaliland;
Markuu Tixgeliyey: Ahmiyadda Wakiiladda Somaliland u fadhiya dalalka dibaddu u leeyihiin dhismaha Qaranka;
Markuu Arkay: In baahi loo qabo magacaabista iyo buuxinta jagada Wakiilada Jamhuuriyadda Somaliland u fadhiya Dalalka China; iyo Isu-tagga Imaaraadka Carabta.
Markuu Ka Fiirsaday: Kartidooda, aqoontooda iyo hufnaantooda shaqo;
Markuu Ku Qancay: In ay hanan karaan xilkan loo magacaabay;
Wuxuu go’aansaday
1.In Mudane, Cabdi Maxamuud Saleebaan Ciise (Mingiiste), laga bilaabo taariikhda maanta uu ahaado Wakiilka Jamhuuriyadda Somaliland u fadhiya Dalka China
2.In Mudane, Baashe Cawil Cumar, laga bilaabo taariikhda maanta uu ahaado Wakiilka Jamhuuriyadda Somaliland u fadhiya Dalka Isu-tagga Imaaraadka Carabta,” Sidaas ayaa lagu sheegay war-saxaafadeedka ka soo baxay xafiiska afhayeenka madaxtooyada.
Waa Kuma Mingiste?
Cabdi Maxamuud Saleebaan (Mingiste) oo ka mid ahaan jiray siyaasiyiintii Xisbigii burburay ee UDUB xilligii Kulmiye mucaaradka ahaa, ayaa ka mid ahaa shakhsiyaadkii u diga-rogtay Xisbiga Mucaaradka ah ee UCID xilligii uu burburay xisbigiisii hore. Haseyeeshee muddo dhowr sanno ah oo uu ka tirsanaa xisbiga UCID oo uu u qaabilsanaa Xoghayaha Arrimaha Gudaha, waxa uu u diga-rogtay Xisbiga talada dalka haya ee Kulmiye horaantii sannadkii 2014-kii, ilaa wakhtigaasna waxa uu ahaa siyaasi dibad-meer ah oo ka tirsanaa xisbul-Xaakimka.
Waa Kuma Baashe Cawil?
Baashe Cawil oo ka tirsan qoyska Madaxtooyada, ayaa muddo badan saxaafadda Somaliland wax ka qori jirtay inuu saamayn ku leeyahay siyaasadda dalka, in kasta oo aanu marna si rasmi ah uga soo dhex-muuqan saaxadda siyaasadda. Haseyeeshee, xilka madaxweynuhu u magacaabay, ayaa noqonaya markii u horeysay ee uu si rasmi ah uga soo dhex-muuqdo saaxadda siyaasadda dalka.
Baashe Cawil Cumar oo sannadihii u dambeeyey deggenaa dalka Imaaraadka Carabta, ayaa waxbarashadii iyo waayaaragnimadiisa shaqo ku soo qaatay dalalka Maraykanka, Ingiriiska iyo Kenya oo uu muddo badan ku sugnaa. Dalka Ingiriiska intii uu ku sugnaa, wuxuu wax ku bartay Univeristy College London halkaas oo uu kaga takhasusay Maadada Chemistry, isagoo markii dambe Jaamacada Manchester University ka qaatay Shahaadada MSc oo uu ku sameeyay Cilmiga Petrochemistry.
Sida aanu ka soo xigannay, taariikh nololeedkiisa oo lagu baahiyey barta Facebook, waxa uu Baashe Cawil markii dambe fursad u helay inuu shaqadiisii koowaad ka bilaabo markuu dhamaystay jaamacada, shirkada Thermo Fisher Scientific, xarunteeda Maraykanka, oo muddo gaadhaysa 10 sannadood u qaabilsanaa Research Scientist.
Himilomedia.com
Hargeysa-Somaliland